Kea ‑mɔ ‑nyɩ" 'ʋn dɩ ‑wee'‑
65
Dafi 'a 'dʋ ɔɔ blea, ‑ɛ ‑nɩa 'de 'dʋ blei klaa" 'a 'dʋsbɛ 'di ɛ.
2 Kea ‑mɔ ‑nɩa 'e Siɔn ɛ,
‑mɔ ‑a ‑te' ‑kwlɩ" ‑aa muɛ ‑ma 'nynɩ "i 'bɛɛa' 'de Selisalɛmʋ.
Wlu ‑a cɛan ‑tie" 'de ‑ʋn ‑pee ‑aa muɛ nʋa'.
3 ‑Mɔ ‑ɔɔ poa nyɔ 'ɔ baewlu doun" o,
nyʋ ‑wee'‑ "klein a muɛ ‑ʋn o jia'.
4 'Ma dɛsaʋn 'a ‑gbɛ kuɛkwa, ɛɛ 'nyɛ 'ʋn "kpei,
'kaa ‑ma ‑wlʋɛ nyɔ 'ɔ dɛsaʋn "kpei.
5 'Mʋa‑ nʋ nyɔ ‑ɩn ‑sa 'e mu ‑wɛe ‑ɩn ‑da 'de ‑ʋn ‑pʋn" ɛ,
‑ɔ ‑tia" 'de ‑ma ‑gbu" ‑sɔn, dɩ 'dɔe ‑nɩa 'de ‑gbu" ‑sɔn ɛ,
ɩa dboo ‑a ‑ʋn ‑ɛ. Dɩ ‑nɩa 'e ‑ma ‑gbɛɛ'‑ na', ɩ ‑wee'‑ ‑kwɛi.
6 'De "isrɛa' 'ʋn mɔ ‑ma ‑tmʋa dɩ 'dɔe ‑pee,
Kea ‑aa 'pʋʋ i, 'blʋa ‑wee'‑ "klein 'a tɔi" tba na',
dɛ ‑mua' mamaʋ ‑ɛ ‑jɛɛa 'de 'tɔniɛ 'ɛ duu' 'di ɛ.
7 'De ‑ma "ikmaa' 'ʋn mɔ ‑ma kpʋn crʋ 'de ɩa' ‑tein',
‑ɩn ‑bleɛ "ikmaa',
8 ɛmɛ ‑ɛɛ jaa 'tɔniɛ 'ɛ ‑gboo ja, ɛmɛ ‑ɛɛ jaa 'tɔniɛ 'ɛ kluwlu ja,
ɛ ke 'blʋa 'dinyʋ 'a cnuɛn" ke‑
9 nyʋ ‑nɩa 'de 'blʋa 'a "ti na' a,
ʋʋa ‑gbʋɛn jrii' klae" ‑ma nʋa ja 'dɔe 'ʋn.
‑Mɔ dɛ‑nʋɛ' ‑wɛe nyʋ ‑nɩa 'e 'jrʋ 'a 'wlʋɩn' ke
ɛɛ' bluɩn' ‑wee'‑ a nʋ 'mʋa‑.
Ka ‑ma nʋa 'blʋa nmae sʋn 'ka ka.
10 ‑Mɔɔ ‑tu" 'blʋa 'a ‑tɩ' ‑wɛe ‑ɔɔ ‑nyɩɛ" "ni,
‑mɔɔ ‑wlʋʋɛ' dɛ 'ʋn. Kea, ‑ma "ni gbii ‑wee'‑ "jii.
‑Mɔɔ nmɔɔ 'blʋa ‑wɛe diiɛ 'wlʋ 'de nyiɔɔ' ‑tɩ' 'ʋn.
11 ‑Mɔɔ po 'blʋ ‑sro "ni "kpei,
‑mɔɔ waa "tian i ‑wɛe ‑ma ‑sɛ' "ni 'ʋn,
‑wɛe dɩ ‑ɩa mɛa ‑ma pʋɩ "diwan‑.
12 ‑Ɩn kan ‑sʋn "jru i 'de 'dɔe nʋa' 'ʋn,
‑wɛe 'diwɔnmɔa' a sɛn i 'de ‑ma ‑jeblʋ "i.
13 "Ni a sɛn i 'de wlao ‑wee'‑ "klein 'di,
'mʋa‑ cnuɛn" "siiɛ crʋ ‑wee'‑ "klein "i.
14 Nɔ" dɩ "ji 'e ɩa' 'pɛn na' 'mɛ, wlao ‑wee'‑ "jiɛ sii" 'dii,
'mʋa‑ nʋ cnuɛn" o ble cnuɛn" ɛ 'kpaa.